16 марта 1376 год
16 марта 1376 г. – Того же лета посылал князь великий Дмитрей Ивановичь князя Дмитрея Волынского ратью на безбожных болгар, а князь Дмитрей Костянтиновичь суждальской посла сыны своя Василья да Ивана, а с ними бояр своих и вои многи. И приидоша в Болгары марта 16. Погании же изыдоша против их, и стагаа на бой и нача стреляти, а инии з града гром пущаху, страшаще полки руския, а инии из самострелов стреляху, а друзии на верблюдах выежжаше, полошающе кони руския. Они же никако сего не страшахуся, но крепко сташа на бой. Окаяннии же болгары побегоша во град свой, и погониша русь по них, и убиша ту бесермян 70. Князи же болгарский Асан и Махмат Салтан добиста челом великому князю и тестю его князю Дмитрею Костянтиновичю 2000 рублями, а ратем их 3000 рублями, а дарагу и таможника великаго князя посадиша в Болгарех и отъидошя прочь, многа зла сотворивше поганым, суды их и села, и зимницы пожгошя, а людей изсекошя.